Kubok bahsida «Real» darvozasini kim qo‘riqlashi ma’lum bo‘ldi

«Real Madrid» bosh murabbiyi Karlo Anchelotti «Deportiva Minera»ga qarshi o‘yinda darvozabon Andrey Lunin jamoaning asosiy tarkibida bo‘ladimi yoki yo‘qligini aytdi.

«Ha, Lunin ertaga maydonga tushadi, chunki Kurtua yaxshi dam olishi va tiklanishi kerak. Lunin chempionatda, kubokda yoki Chempionlar ligasida o‘ynay oladi, shuning uchun uni faqat kubokda o‘ynaydi deb ayta olmayman», – dedi Anchelotti Madrid Universal bilan suhbatda.

Joriy mavsumda 25 yoshli darvozabon barcha musobaqalarda beshta uchrashuvda ishtirok etib, sakkizta gol o‘tkazib yubordi va ikki bor o‘z darvozasi dahlsizligini saqlab qoldi.

«Deportiva Minera» va «Real Madrid» o‘rtasidagi Ispaniya kubogining 1/16 final bosqichidan o‘rin olgan uchrashuv 6 yanvar kuni Toshkent vaqti bilan soat 23:00da boshlanadi.

Yangilik manbasi – https://stadion.uz/