Ismoil Bennosir: «Afrika kubogida faqat g‘oliblikni ko‘zlab harakat qilamiz»
«Milan» yarim himoyachisi Ismoil Bennosir uzoq muddatli tiklanish jarayonidan so‘ng safga qaytdi.
U 2 dekabr kuni «A» seriya 14-turidan o‘rin olgan «Frozinone»ga qarshi o‘yin (3:1)ga zaxiradan qo‘shildi. Goal.com sayti jurnalistlari shu uchrashuv arafasida marokashlik futbolchiga intervyu masalasida yuzlanishdi va u iltimosni rad etmadi. Suhbat jarayonida esa Ismoil turli mavzularga to‘xtaldi: darvozabon Janluiji Donnarummaning Milanda «iliq» qarshi olingani, Zlatan Ibragimovichning qaytishi haqidagi gap-so‘zlar, yangi yulduzcha Franchesko Kamarda istiqboli…
– Ibragimovich «Milan»ga qaytayotgan ekan. Bundan xursandmisiz?
– Albatta, agar chindan ham, qaytsa, zo‘r bo‘ladi. Binobarin, Zlatan klubning haqiqiy afsonasi va foydasi tegishi muqarrar. Shaxsan men u bilan qayta uchrashishdan faqat xursand bo‘laman. Qaytaraman, Ibra hamisha jamoaga yordam berib kelgan va rahbarlik rolida ham shu ishini davom ettirishiga ishonchim komil. Xullas, agar qaytsa, bundan nafaqat jamoa, balki futbolchilar ham manfaat ko‘rishadi. Umuman, Zlatan bilan haligacha yaqin aloqadamiz, u biz uchun shunchaki, oddiy sobiq klubdosh emas.
– Janluiji Donnarummaning ketganidan qattiq ranjigan «Milan» muxlislari uni juda «iliq» qarshi olishdi yaqinda CHL o‘yinida. Shu holatga alohida to‘xtala olasizmi?
– Jiji «San Siro»da uni nimalar kutib turganini juda yaxshi bilardi – bu futbolning bir qismi. O‘zi millionlar o‘yini olami shunday: sen maydonda umumiy muhit tufayli tushadigan har qanday bosimni yengib o‘tishing shart. Aks holda… Yo‘q, stadionning Donnarummaga munosabati muxlislar uni yoqtirmasliklaridan emas. Shunchaki, «Milan»da o‘ynab, hammaning qalbidan joy olganingdan keyin ketishing muxlislarga hamisha og‘ir botadi. Axir «Milan» tiffozilari Jijiga mutlaqo o‘rganib qolishgandi. Ehtimol, bu yerda biz hech qachon bilolmaydigan boshqa jihatlar ham bordir. Shubhasiz, unga biroz qiyin bo‘ldi, ammo bunaqasi har bir futbolchi boshiga tushishi mumkin.
– O‘smir yigit – Franchesko Kamarda debyutiga baho bersangiz…
– Umid qilamanki, u kelajakda yetuk futbolchiga aylanadi. Oldin faqat ismini bilardim, endi esa biz bilan birga shug‘ullanmoqda va ko‘rganlarimga tayanib aytaman, Franchesko – haqiqiy hujumchi. Yigitchaning golga tashnaligi shundoq sezilib turibdi, unda o‘z qobiliyatini to‘liq namoyish etish ishtiyoqi kuchli. Lekin Kamarda hali shakllanishi va mashg‘ulotlarda bor kuchi bilan ishlashda davom etishi kerak. Zero, hozirda ba’zi futbolchilar safda emaslar, jumladan, Olivye Jiru bo‘lajak bahsda qatnashmaydi. Demoqchimanki, hozirgi holat Franchesko uchun – zo‘r imkoniyat. Bundan qanday foydalanish esa faqat o‘ziga bog‘liq, chunki maydonda yosh rol o‘ynamaydi. Umuman, uning haqiqiy goleadorga aylanib, o‘z gollari bilan «Milan» tarixidan joy olishiga umid bog‘lasak bo‘ladi.
– Tiklanish jarayonida sabr bilan ishladingizmi yoki tezroq qaytish uchun o‘zingizni biroz qiynadingiz?
– Barchasi ma’lum vaziyatlarga charbarchas bog‘liq. Tabiatan o‘z ustimda mustaqil ishlashga moyilman. Mana, ko‘pchilik muddatidan oldin qaytayotganimni aytmoqda. Aslida jarohatdan tiklanish muddati aniq emasdi. Faqat 6 oydan 9 oygacha cho‘zilishi mumkinligini aytishgandi. Hozir 7-oy ketmoqda, shunday ekan, qaytishim belgilangan muddatga mos kelmoqda. Mashg‘ulotlarda ishlash chog‘i avvalo, menda hammasi joyida ekanligiga ishonch hosil qilishni xohladim. To‘g‘ri, chidamlilik va maromni biroz oshirdim, zero, ozgina jon kuydirmasangiz, sport formasiga kirib olishingiz qiyin. Hozirgi holatda ham menga biroz jismoniy tetiklik yetishmayapti, lekin turli usullarda ko‘proq ishlash orqali sur’atni oshirishga urinyapman. Misol uchun, stasionar velosipedda me’yoridan ko‘proq shug‘ullanyapman.
– Endi «Arsenal»dagi tajribani ham yodga olsak…
– Bu klubga bog‘liq nimadandir aslo afsuslanmayman. Har holda, bu o‘zim uchun eng to‘g‘ri yo‘l ekanligiga mutlaqo ishongan holda, qaror qabul qilgandim. Qolaversa, «Arsenal»da ajoyib davrni boshdan o‘tkazdim, 2 yil davomida yaxshigina tajriba oldim. O‘zi Angliyaga aynan shu maqsadda borgandim, chunki qadrdon shaharcham – Arleda bunday imkoniyat yo‘q edi. Ha, «Arsenal»ning asosiy tarkibidan muntazam joy olish uchun menga nimadir yetishmagani rost. Shuning uchun 3-4 yillik shartnoma tuzgan bo‘lsamda, ertaroq ketishni ma’qul ko‘rdim. Umuman, «Arsenal» variantini ongli ravishda tanlagandim va hozirga qadar bundan afsuslanmayman.
– Afrika Millatlar kubogi starti ham tobora yaqinlashmoqda…
– Marokash milliy jamoasi qit’a chempionatida zafar quchishi mumkinmi? Albatta. Sen shunday yirik turnirga kuchli jamoa safida borganingda, faqat g‘alaba haqida o‘ylaysan, eng yuqori marrani ko‘zlaysan. Aks holda, turnirda qatnashishdan mantiq yo‘q. Allaqachon Afrika kubogini qo‘lga kiritganmiz. Demak, bu safar muvaffaqiyatni takrorlashga urinib ko‘ramiz.
MUHAMMADXON tayyorladi
Manba: «Интерфутбол» газетаси
Yangilik manbasi – https://stadion.uz/
