Jud Bellingem: «Har doim Zidan kabi futbolchi bo‘lishni istaganman»
Shubhasiz, Jud Bellingem barchani hayratda qoldirdi. «Real»da ingliz pleymeykerining bunday yorqin startini ko‘pchilik kutmagandi.
«Raymon Kopa» mukofotini qo‘lga kiritgandan so‘ng, Bellingem kelgusi yil asosiy individual mukofot uchun kurashishga tayyor ko‘rinadi. Har holda, u L’Equipe nashriga bergan intervyusida shu kabi bir qator qiziq savollarga javob berdi.
Ota-onasi haqida:
– Men ota-onamga yaqinman va munosabatlarimiz menga muvozanat beradi. Faoliyatim ko‘tarilishidan oldin ular butun umr ishlashga majbur bo‘lishdi. Men professional futbolchi bo‘lishdan oldin ularning qiyinchiliklarga duch kelishganini o‘z ko‘zim bilan ko‘rdim. Va ular qanday qilib har qanday muhitda o‘zlarini topishlari, eng yaxshi bo‘lishlari mumkinligiga qoyil qolaman.
Oilasi haqida:
– Oilani qo‘llab-quvvatlash men uchun juda muhimdir. Ko‘pchilik futbolchi uning manfaatlarini hurmat qilishdan ko‘ra, ko‘proq pulga qiziqadigan agentlarga ega. Menda hech qachon agent bo‘lmagan, chunki ota-onam yaqin. Ular mening farovonligimdan xavotirda, bizning orzularimiz o‘xshashligini bilishadi. Agentlar o‘zlarining rag‘batlariga ega – ular pul ishlashni xohlashadi. Men esa oilam qurshovida bo‘lishni xohlayman. Bizning suhbatlarimiz har doim qiziqarli kechadi: biz kinodan tortib «Real»ning qiziqishigacha bo‘lgan hamma narsani muhokama qilamiz.
Futbol haqida:
– Menga juda yaqin odamlar noto‘g‘ri yo‘nalishda ketayotganini ko‘rdim. Agar siz o‘yinning o‘zi uchun futbolni yaxshi ko‘rsangiz, unda albatta bir kuni mukofotlanasiz. Agar o‘y-xayolingiz hurmat-e’tibor va shon-sharafda bo‘lsa, aytamanki, bu noto‘g‘ri yo‘l.
To‘purar otasi haqida:
– U hech qachon bu haqda unutishimga yo‘l qo‘ymaydi, bu haqda ko‘p gapiradi. Men gol urganimda, shunday deydi: «Men bo‘lganimda yana 3-4ta urardim».
Bolalik orzusi haqida:
– Terma jamoada o‘ynashni orzu qilardim. Ammo agar ilgari kimdir menga hech qachon Premyer-ligada o‘ynamasdan 3 yilni Germaniyada o‘tkazishim, keyin esa Ispaniyaga yo‘l olishimni aytsa, men hayratda qolardim.
Yo‘lining boshlanishi haqida:
– Dastlab menga futbol yoqmadi. Bilaman, bu aql bovar qilmaydigan narsa, chunki agar hozir futbolsiz qolsam, aqldan ozaman. Otamning mashg‘ulotlariga borardim va u yerda faqat giyohlar, gullar terardim. Onam uchun ixchamgina romashka guldastasini yasaganimni yaxshi eslayman. Ota-onam menga hech qachon bosim o‘tkazishmagan. Otam meni o‘zi bilan olib ketardi, lekin agar bekinmachoq o‘ynash yoki gul terishni xohlasam, qarshi bo‘lmaslgini aytardi. Ammo keyinchalik o‘zim futbolga bog‘lanib qoldim… Men o‘yinda erkinlikni his qildim. Takror aytaman, ota-onam meni hech qachon futbol o‘ynashga majburlamadilar, ular shunchaki o‘zimni yaxshi tutishim va boshqalarga g‘amxo‘rlik qilishimni xohlashdi.
Futbolga muhabbat sabablari haqida:
– Hamma gap raqobatda. Men uni doim yaxshi ko‘rardim. Ulg‘aygach juda ko‘p muammolarga duch keldim, ayniqsa yutqazganimda. Bu hamma uchun qiyin edi. Men hatto qo‘l siqishni xohlamadim. Lekin hurmat ko‘rsatishni o‘rgandim. Shubhasiz, men o‘yinni juda yaxshi ko‘rardim, chunki unda raqobat bor.
Kumiri haqida:
– Men «Birmingem» futbolchilariga qoyil qolgandim – bu jamoa «Uembli»da Liga Kubogini qo‘lga kiritgandi (2011 yilda «Arsenal» 2:1 hisobida dog‘da qoldirilgan). Mening qahramonlarim Sebastian Larsson, Kreyg Gardner va Li Boyer edi. Ammo eng asosiy kumirim otam. Keyin Ueyn Runi va Stiven Jerrard o‘yinlariga qoyil qoldim, chunki ular Angliya uchun o‘ynashgan. Otamda Zidan raqami yozilgan futbolka bo‘lardi, uni plyajda sotib olgandi. U doimiy ravishda, shu jumladan uyda ham o‘sha libosni kiyib yurardi. Bir kuni undan: «Bu qanday odam?», – deb so‘radim. U esa: «YouTube»ni ochib ko‘r», – dedi. O‘shandan beri men uni kuzatishni to‘xtatmadim. Zidan men bo‘lishni istagan futbolchi edi. Va u bilan 2022 yilda «Real» va «Liverpul» o‘rtasidagi Chempionlar Ligasi finalida uchrashganimdan baxtiyorman. O‘shanda g‘ayratli bolaga o‘xshardim. Va Zidan o‘zining barcha yutuqlarini hisobga olgan holda o‘zini juda kamtar tutdi. «Real»da uning qo‘l ostida mashq qilgan yigitlarning so‘zlariga ko‘ra, u ajoyib murabbiy ham ekan.
Zidan va «5» raqam haqida:
– Bu, albatta, o‘ziga xos hurmat. Ammo shu bilan birga, men o‘z yo‘limda ketyapman va bu raqamni o‘zim ko‘rishni xohlaganimdek qilishim kerak: «Real»ning zamonaviy «5» raqami.
«Birmingem» va «22» raqam haqida:
– Menga qaytib kelgunimcha hech kim bu raqam ostida o‘ynamasligini aytishdi. Bundan hayratda qoldim. Men jamoada 2019G‘20 yilgi mavsumni yaxshi o‘tkazdim, ammo g‘ayritabiiy narsa yo‘q. Bu qarorni tushunaman, axir mening transferim qiyin vaziyatda klubga yordam bergandida.
Erta kamolga yetish haqida:
– Maydondagi hatti-harakatlarim va turli vaziyatlarga javob berish qobiliyatim muhokama qilinayotganini ko‘p marta eshitganman. Muammo shundaki, ular sizni poydevorga qo‘yishadi. Ammo men ham xato qilaman, men ham oddiy insonman, ba’zida boshimni yo‘qotaman va odamlar: «Oh, qaranglar, u unchalik ham yetuk emas ekan», deyishadi. Lekin men robot emasman.
«Real» kiyinish xonasidan ilk taassuroti haqida:
– Men asabiylashdim. Hech qachon shuncha yulduzlar oldida turmaganman, lekin kiyinish xonasiga kirganimda, bu yigitlar nimalarga erishgani haqida o‘ylamay turolmadim. Ammo keyin ular ham oddiy yigitlar ekanligini angladim: ular meni qulay his qilishimni xohlashadi, ular kamtar edi. Bu men uchun muhim saboq bo‘ldi. Siz qanchalik muvaffaqiyatli ekanligingiz, nima yutganingiz muhim emas, siz maydonda ham, uning tashqarisida ham yaxshi inson bo‘lib qolishingiz mumkin, xuddi menga ilhom baxsh etgan bu yigitlar kabi.
«Real» safidagi birinchi o‘yin haqida:
– Bu tuyg‘uni tasvirlash uchun yetarli so‘zlar yo‘q. Bu men uchun orzuning amalga oshishidir. Afsonaviy futbolka. Uni kiyganingizda, xuddi superqahramon kostyumini kiygandek his qilish katta sharafdir. Uni kiyishni davom ettirish uchun ma’lum bir darajani ko‘rsatish kerak, albatta.
5 yildan keyingi holati haqida:
– Umid qilamanki, Chempionlar Ligasida 5 marta, Yevroda va ehtimol jahon chempionatida g‘olib chiqarman. Men hamma narsaga optimistik qarashga harakat qilaman. Mag‘lubiyatni tan olib o‘ynashdan ma’ni ko‘rmayapman. Siz har doim g‘alaba qozonishingizga ishonch hosil qilishingiz kerak, aks holda o‘ynashdan nima ma’no?
MUHAMMADXON tayyorladi
Manba: «Интерфутбол» газетаси
Yangilik manbasi – https://stadion.uz/
