Teylor VAR tekshiruvlari haddan tashqari uzoq davom etayotganini tanqid qildi

Angliyalik sobiq hakam Entoni Teylor VAR tizimidan asosan aniq va jiddiy xatolarni tuzatish uchun foydalanish kerak, deb hisoblaydi. Uning fikricha, bahsli vaziyatlarni eng mayda detallargacha uzoq vaqt tahlil qilish VARning asosiy maqsadi emas.

«VAR bilan bog‘liq barcha o‘zgarishlar, agar ular qarorlar aniqligini oshirishga xizmat qilsa, foydali. Ammo shuni unutmaslik kerakki, VAR adolat hissini ta’minlash, ya’ni jiddiy va aniq xatolarni tuzatish uchun yaratilgan. U mikroskopik va uzoq davom etadigan tekshiruvlar uchun mo‘ljallanmagan.

Agar biz haddan tashqari mayda tahlillar va uzoq tekshiruvlardan voz kechish yo‘lida davom etsak, VAR faqat xato bo‘lganini aniq tasdiqlovchi dalil mavjud vaziyatlarda aralashsa, odamlar bu jarayonni yaxshiroq qabul qila boshlaydi va unga ishonchi ortadi.

Menimcha, ko‘pchilik ba’zan VAR juda uzoq va haddan tashqari batafsil ishlatilayotganiga qo‘shiladi.

Epizodlarni ortiqcha uzoq ko‘rib chiqish shart emas. Agar qaror xato bo‘lganini aniq ko‘rsatuvchi vizual dalil mavjud bo‘lsa, shundagina VAR aralashishi va qaror o‘zgartirilishi kerak», — dedi Teylor.

Yangilik manbasi – https://stadion.uz/