Milliarderlar uchun yangi yil sovg‘asi
Top-chempionatlar yetakchisi bo‘lgan APL kirib kelayotgan 2024 yil qishki transferiga puxta hozirlik ko‘rmoqda.
Osimxen, Kvarasxeliya, navbatdagi Bellingem kabi iqtidorlar futbol olamining diqqat markazida turibdilar.
Viktor Osimxen («Napoli»)
Qishda «Yuventus» serbiyalik hujumchi Vlaxovichni qo‘yib yuborishiga ishonch yo‘q. Osimxen esa «Napoli»ni tark etishga qarshi emas. Shu bois, uning «Chelsi»ga yo‘l olishi sensasiya bo‘lmaydi, lekin qishki transfer darchasining rekordi o‘rnatilishi mumkin. Boeli izmidagi konsorsium estafetani Abramovichdan qabul qilib oldi. Dollarning pasayishidagi ulkan xarajatlardan keyin «ko‘klar» yangi kelishuvlarga shaylar. Klub bilan yaxshi munosabat o‘rnatgan «Napoli» sohibi De Laurentis avvalroq Klubalini Londonga jo‘natgandi. Senegallik himoyachining APLdagi omadsizligi nigeriyalik Osimxenni sergaklikka jalb etishi lozim. «Chelsi» barqaror jamoa emas, u yerda o‘z o‘rnini topib olish Viktor uchun oson bo‘lmaydi.
Job Bellingem («Sanderlend»)
Aka-uka Bellingemlarning onasi o‘g‘lonlariga ism tanlashda uzoq bosh qotirib o‘tirmadi. Kattasini Jud, kichigini Job, deb atadi. «Sanderlend» esa markazdagi muammolarni hal etishni 18 yoshli yarim himoyachiga topshirdi. Hujumkor o‘yinchi APL klublarini qiziqtirib qo‘ygandi. Hamma «Borussiya Dortmund» tajribasini takrorlashni istaydi. Nemislar Judni olib kelishdi, keyin u uchun Peresdan bir vagon pul olishdi. Xaridorlar Jobni og‘dirishga oshiqmoqdalar, «Sanderlend»da esa, uni ushlab qolish uchun «kuzirlar» yo‘q. Axir, u Chempionshipning o‘rtamiyona jamoasi. Kichik Bellingem APL saviyasida o‘ynay oladimi? Buni yangi yilda bilib olamiz, Job juda aqlli fikr yuritadi.
Xvicha Kvarasxeliya («Napoli»)
Nomdor klublar skautlari Xvichaning o‘yinini tomosha qilish uchun stadionlarga kelishadi. Aslida, ularga jonli tomoshaning keragi yo‘q, o‘yin davomida faqat Kvarasxeliyani kuzatib turadigan kameralar yozuvi to‘liq ma’lumot beradi. Gruziyalik xavbek jahon miqyosidagi yulduzga aylangan. 22 yoshli futbolchi «A» seriyasidagi oltin mavsumdan keyin erkalanib ketmadi, malakali murabbiyning eng xavfli quroli bo‘lib qolmoqda. Mabodo Massarri bilan kelisha olmasa, yanvarda Osimxen bilan ketishi mumkin.
Santyago Ximenes («Feyenoord»)
Mavsum startining qahramonlaridan biri, Erediviziyeda 16ta gol urgan to‘purar. 22 yoshli meksikalik hujumchi Yevropani o‘ziga jalb etib, Rotterdamni tark etish taraddudida. Uning jamoasi esa «PSV»dan keyin 2-o‘rinda bormoqda. Santyagoning bahosi ko‘tarilib ketayotgani APL vakillarini shoshirib qo‘ydi. Balki u yangi van Persidir? Lekin Ximenes sal orqaroqda ham samarali to‘p suradi.
Joau Nevesh («Benfika»)
Transfer bozorining yetakchi insayderi Fabrisio Romano «Benfika» yanvarda Nevesh bo‘yicha «MYU» bilan muzokara olib bormasligini bildirdi. Shuningdek, «burgutlar» APLga o‘tishi taxmin qilingan boshqa futbolchilar bo‘yicha ham kelishuvlar amalga oshirilmaydi. Eslatib o‘tamiz, Nunyes «Liverpul»ga, Fernandes «Chelsi»ga, Diash «Manchester Siti»ga, Ederson, Raul Ximenes, David Luis va boshqa futbolchilar «Benfika»dan APL klublariga o‘tishgandi. Portugaliya terma jamoasining 19 yoshli markaziy xavbeki Nevesh 120 million yevroli «klausula»ga ega. Agar Kazemiro Saudiyaga yo‘l olsa, Brunu Fernandesh Joauni «MYU»ga chorlashi mumkin.
Yulian Brandt («Borussiya D.»)
Bu futbolchi «Arsenal» va «Nyukasl» nishonida. Joriy mavsumda chempionlikka da’vogarlik qila olmayotgan» «arilar»ga esa, Brandtni ushlab turishning qizig‘i yo‘q. Yagona xavotir, futbolchining Angliyadagi omadsizligi Yevro-2024 turniridan mahrum etishi mumkin. Lekin transfer muammoli Bundestimning yangi bosh murabbiyi bilan kelishilgan holda amalga oshirilsa, Arteta yoki Xau Yulianni o‘z jamoalariga qo‘shib olishadi. Hozir Bundesliga doirasida futbolchi 4ta gol va 5ta assist muallifi, xavfli va universal o‘yinchi. Kadrlar yetishmovchiligiga duch kelgan «Nyukasl» uni mamnuniyat bilan xarid qiladi.
Duglas Luis («Aston Villa»)
Agarda APL boyvachchalari yo‘lida «ortiqcha» raqobatchi paydo bo‘lsa, «Bavariya» taktikasiga o‘tib olishadi. «Tottenxem» ustidan qozonilgan g‘alaba evaziga Emerining «Villa»si yetakchi kvartetga ko‘tarilib oldi. Demak, birmingemliklar klubining yetakchilari uchun ov boshlanadi. Muvaffaqiyatning o‘tkinchi ekanligi tushunarli, lekin «Arsenal» va «MYU»ga xavbeklar yetishmayapti. Luis manfaatli kontraktga imzo chekib, «Villa»ga nisbatan nufuzliroq klubda o‘ynashi mumkin. Emeri hozircha braziliyalik shogirdi sha’niga maqtovlar yog‘dirib, uni qo‘yib yubormasligini aytmoqda. Biroq shu yo‘sindagi e’tirofdan keyin Rays, Xenderson, Milner kabi iqtidorlar nomdor jamoalarga o‘tib ketishdi.
Kelvin Fillips («Manchester Siti»)
Fillipsning «Lids»dan «shaharliklar» klubiga o‘tishi behuda bo‘ldi. Undan samarali foydalana olmayotganini Gvardiola tan oldi. Hatto De Bryuynening jarohati ham Kelvinga Rodrining sherigiga aylanishida yordam bera olmadi. Pep Argentina terma jamoasi hujumchisi Xulian Alvaresga joy topdi hozircha hamma Dokuni maqtamoqda, «Siti» hisobchilari esa faqat sarflash emas, pul ishlash kerakligini eslatishdan charchashmayapti. Bu yog‘iga «Lids»ga sarflangan 50 mln. yevro atrofidagi mablag‘ni taklif etadigan xaridor topilsa, Fillips Manchesterni tark etadi.
Olli Uotkins («Aston Villa»)
Noqonuniy stavkalar uchun diskvalifikasiya muddati tugayotgan Tounidan tashqari, bozorda yana bir angliyalik hujumchi paydo bo‘ldi. Uotkins o‘zining 7 gol va 5 assisti bilan «Aston Villa»ning yetakchi to‘rtlikda bo‘lishiga hissa qo‘shgandi. Biroq mo‘may daromad uning David Luis va Diabi bilan tashkil etgan triosini barbod qilishi mumkin. Hujumchi «Arsenal»ga kerak. Xavers bu pozisiyada o‘z vazifasini uddalay olmadi. Shuningdek, Olli «MYU»ga naf keltirishi ham mumkin. Reshford «Everton»ga gol urdi, lekin sentyabrdan shu paytgacha jamoaga yordam bera olmayotgandi. Oldingi chiziqda dadil to‘p suradigan hujumchini boshqa grandlar ham diqqat bilan kuzatib borishmoqda.
Aaron Ramsdeyl («Arsenal»)
Arteta ispaniyalik Rayyani asosiy darvozabon roliga loyiq topdi. Bu Ramsdeyl uchun o‘ta kuchli zarba bo‘ldi. Futbolchining yaqinlari Aaronni ijaraga bo‘lsa ham boshqa jamoaga o‘tkazish niyatidalar. Chunki faqat shu yo‘l bilan Ramsdeyl Yevro-2024 ishtirokchilari ro‘yxatidan joy olishi mumkin. Yanvardagi transfer ajablantirmaydi. Chunki Arteta oyoqlari bilan yaxshi o‘ynaydigan posbonni afzal ko‘rdi. Mohir darvozabon APLning har bir turida maydonga tushishga arziydi, faqat «Arsenal» libosida emas.
Sodiq SOBIR tayyorladi
Manba: «Интерфутбол» газетаси
Yangilik manbasi – https://stadion.uz/
