Robot-hakam – kelajakdan nishona!
Diqqat, Angliya futbol assosiasiyadan navbatdagi shov-shuvli xabar:
APL o‘yinlarida yaqin orada robot-hakamlarni sinovdan o‘tkazish jarayoni boshlanadi. Oh, futbolchilarga achinish kerak. Axir temir-hakamga na e’tiroz bildirish mumkin, na baqirish…
Xabar berilishicha, AFA bosh ijrochi-direktori Mark Bullingem rahbarligida Angliya futbolida «avtonom» robot-hakamlar xizmatini joriy etish g‘oyasini faol o‘rganib chiqmoqda. Barchasiga APL doirasidagi oxirgi uchrashuvlarda kuzatilgan yuqori darajali hakamlik xatolari seriyasi sababdir. Janob Bullingem Daily Mail nashriga bergan intervyusida bu masalada muayyan qarashga egaligini yashirmadi: «Albatta, oldin ham hakamlarning noto‘g‘ri qarorlari yuzasidan yetarlicha e’tiroz va rasmiy shikoyatlar tushgan. Endi xatolarni kamaytirish masalasida qat’iy qadam tashlash kerak. Menimcha, robot-hakamlar g‘oyasi bu borada boshlang‘ich nuqta bo‘ladi. Hozir texnologiya nuqtai nazaridan katta savol bor: qarorlarni tezroq qabul qilish imkoniyatini oshirish mumkinmi? Chunki o‘yin vaqti yuzaga keladigan uzoq to‘xtalishlar hech kimga yoqmaydi, baribir».
AFA bosh ijrochi-direktorining aytishicha, Angliyada hakamlikni to‘liq avtomatlashtirish g‘oyasiga qiziqish katta. «Mana, masalan, o‘yindan tashqari holatni aniqlashtirish uchun yarim avtomatik texnologiyadan foydalanayotganimizga ancha bo‘ldi. Xo‘sh, hakamlik oxir-oqibat, butunlay avtomatlashtirilishi mumkinmi? Nega mumkin emas. Har holda, urinib ko‘rish kerak…», – deya Mark Bullingem so‘zlaridan iqtibos keltirdi Daily Mail nashri.
Manba: «Интерфутбол» газетаси
Yangilik manbasi – https://stadion.uz/
